Notísia foun


DILI—Iha loron sabadu (14/12), joven sira feto no mane inunda (menbanjiri) Kuartel Jeral FALINTIL-Forsa Defeza Timor-Leste (F-FDTL) Fatuhada-Dili, hodi hadau malu formuláriu ba rekrutamentu membru F-FDTL foun tinan-2020, ne’ebé fahe direta husi ekipa konjuntu Komisaun Ministériu Defeza no Komandu F-FDTL.

Tuir observasaun jornalista iha trreinu hatudu katak maiz ou menus oras tuku 6 dadersan, joven feto no mane husi munispiu 12 inklui Oekusi, nakonu ona iha aredores edifisiu Kuartel Jeral F-FDTL hodi hein formuláriu ne’ebé atribui husi komisaun. Alen de iha aredores, iha li’ur parte estrada, nakonu ho karrta no motor ne’ebe rezulta engrafamentu, maibé konsege nornaliza husi polisia tránzitu.

Enkuantu, iha entrevista,  joven ida husi Munisípiu Likisá,  José da Silva hateten, nia parte prepara ona dokumentu kompletu hodi kompete iha vaga 600 ne’ebé ekipa komisaun ba rekrutamentu fó sai ona, tanba fó oportunidade ba sidadaun timor oan ne’ebé iha interese bele konkorre ba vaga ne’e.

Tuir nia, formuláriu ne’ebé antes ne’e fahe ba kada suku 25 de’it no halo joven barak mak  la hetan oportunidade.

“Ha’u sente kontente tebes bainhira foti formuláriu, tanba iha suku formuláriu 25 de’it, maibé ohin ami juventude (joven) husi Munisipiu 12 no Oekusi mai iha fatin ne’e, sente kontente tanba bele hetan hotu formuláriu,” dehan José iha dada-lia ho jornalista sira, hafoin simu formulariu husi komisaun.

Nia dehan, mezmu Komandu F-FDTL presiza de’it joven 600 no fahe formuláriu rihun 11,000,  signifika  kompetisaun ba rekrutamentu makas tebes. Tanba ema 600 sei liu no sira seluk sei hela hotu.

“Hanesan joven ohin ami ho maluk joven sira mai forma iha ne’e bele kompete iha vaga ne’e, agora atu liu ka la liu ne’e depende ba ita idak-idak nia sorte,” tenik José.

Iha fatin hanesan, feto joven husi Munisipiu Aileu, Imaculada Pinheiro hatete, nia parte prontu atu kompete iha vaga ne’e.

“Ba ohin loron ha’u sente difisil tebes atu hetan formuláriu iha ne’e, maibé ha’u sente kontente tanba atu hetan susesu liu husi prosesu ne’ebé mak difisil foin mak hetan prosesu ne’ebé fasil,” katak nia.

Iha fatin hanesan, Vise Prezidente Komisaun Rekrutamentu, Koronél Constantino Moreira dehan, total formulariu ne’ebé fahe iha Kuartel Jeral kada estasaun hamutuk formulariu atus tolu (300). No formuláriu sira ne’e hahu fahe ohin (14/12), maibé kuandu la hotu sei kontinua to  aplikante sira hetan hotu formulariu.

“Em prinsipiu, ami iha ordem komandu, liliu husi Presidente Komisaun. Ami iha fleksibilidade de tempu, signifika ami nian disponibilidade atu atende rekrumtamentu ne’e bazeia ba kondisaun iha terenu, kuandu ohin formulariu la tó lokraik ami informa ba Presidente Komisaun, no informa ba Jeneral para sira hola desizaun ruma kona-ba situasuan ne’ebé ami infrenta iha terenu,” nia informa.

Iha atribuisaun formuláriu ne’e, komisaun fó orientasaun lubuk ida ba aplikante sira, katak aplikante sira mai iha fatin ne’e atu simu formuláriu, labele kria problema no bainhira simu hotu, tenke fila ba ida-idak nia fatin para prepara iha faze tuir mai.

Tuir nia,  formulariu sira ne’ebé aplikante sira simu iha Kuartel Jeral F-FDTL sei hatama iha kada ida-idak nian suku original iha loron 6 fulan Janeiru tinan 2020, hodi nune’e ekipa sira sei ba halo levantamentu iha munisipiu. (jry)

Please follow and like us:

NOTÍSIA FOUN

Site Statistics

  • Users online: 6 
  • Visitors today : 1,056
  • Page views today : 1,500
  • Total visitors : 80,308
  • Total page view: 112,581

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur