Notísia foun


DILI—Governu lamenta ho publikasaun gravasaun audio husi reuniaun Ministériu Saúde.

“Iha intensaun àt ba nia superior ou ba instituisaun ne’e,” Governu liuhusi Sekretáriu Estadu ba Komunikasaun Sosial Merício Juvinal dos Reis “Akara”, afirma liuhusi komunikadu ba imprensa ne’ebé Timor Post asesu, Segunda (09/12/2019).

Komunikadu ne’e fó sai relasiona ho iha loron hirak ikus ne’e, utilizador media sosial sira akompaña publikasaun gravasaun audio (lian) husi reuniaun internal Ministériu Saude nian ne’ebé sai viral no hetan reazem no insult oin-oin husi utilizador media sosial nian.

Komunikadu ne’e haktuir, governu lamenta tebes ho individu balun iha Ministériu Saúde ne’ebé ho intensaun halo gravasaun reuniaun internal Ministériu nian no publika la ho autorizasaun atores sira iha reuniaun nian. Aktu hirak ne’e la tuir etika no prefionalizmu nudar funsionario estadu nian.

Sekretariu Estadu ba Komunikasaun Sosial S.E. Sr. Merício Juvinal dos Reis “Akara” akompaña publikasaun hirak ne’e no hanoin katak aktus hirak ne’e ho intensaun àt atu desakredita nia superior sira, tamba ne’e persiza investigasaun klean hodi identifika lolos motivu husi aktus hirak ne’e.

“Hau preokupa tebes ho publikasaun sira ne’e. Reuniaun Internal superior sira nian iha instituisaun ida, ne’e husik ba informasaun internal, maibe wainhira kuandu halo gravasaun no publika fali ba liur ne’e ita bele hare momos katak nia iha intensaun àt ba nia superior ou ba instituisaun ne’e. Ne’ebé ita hein sira halo investigasaun para prova lolos motivu saida husi nia aktu ne’e”

Governo liu hus Ministériu da Saude sei halo investigasaun klean hodi identifika no deskobre motivu husi gravasaun refere, no kompromete katak wainhira provadu katak gravasaun hirak ne’e halo ho intensaun atu deskredita membros do governo nudar nudar superior maximu instituisaun nian ka ho intensaun atu hamonu imajem instituisaun estadu nian, mak nia sei simu nia konsekuensia husi aktus ne’ebé nia Komete.

Ida ne’e nudar mos lisaun ida ba funsionario estadu no media sira hotu ne’ebé iha kna’ar atu divulga informasaun atu hare, check no crosscheck ba informasaun hirak ne’ebé persiza divulga hodi kontinua kumpri ita nia profesionalismu nudar media no nudar servidor estadu nian.

Gravasaun Mistériu, Vise Ministru Bonifácio husik hela Ministra Interina Élia ho Diretór Hafoin Funu Ibun

Antes ne’e, mosu gravasaun mistériu ne’ebé haktuir funu ibun Vise Ministru Dezenvolvimentu Estratéjiku Saúde, Bonifácio Maukoli dos Reis ho Vise Ministra Kuidadu Saúde Primária, Élia António de Araújo dos Reis Amaral.

Gravasaun ne’e haktuir membru governu na’in rua ne’e haksesuk malu, ida-idak defende-an tuir poder ne’ebé sira iha nu’udar membru governu.

Timor Post simu gravasaun audio mistériu ne’e iha loron Sesta (06/12/2019), ne’ebé afinál hahú iha loron ne’e duni gravasaun ne’e lekar iha rede sosiál, ema manda ba malu liu husi mensajen ka inbox gravasaun ho durasaun kuaze minutu 12 ne’e.

Gravasaun ne’e haktuir foufoun Ministra Interina Élia halo uluk investigasaun verbal ba diretór jerál ida ne’ebé tuir Élia la kumpri nia orientasaun. Iha gravasaun ne’e diretór ne’e fó resposta ho rajaun karak nia la ba Maliana hodi partisipa serimónia selebrasaun APTL tuir orientasaun Élia nian tanba simu fali orientasaun husi Bonifacio la permite nia hala’o viajen tanba tenke halo preparasaun ba orsamentu jerál estadu 2020 nian husi ministériu saúde.

Nune’e, liu minutu hirak nia laran Élia fila ba Bonifácio hodi husu rajaun ne’ebé nia konsidera hanesan boikota ida vise ministru halo ba ministra interina. Husi ne’e, haktuir iha gravasaun ne’e, ema importante na’in rua iha ministériu saúde ne’e hahú haksesuk malu alias funu ibun kona-ba kompeténsia sira na’in rua nian.

Élia ho Bonifácio ida-idak defende sira nia rajaun no akuja malu halo boikota ba malu. Sira mós akuja malu vinga malu, iha ne’ebé durante ne’e kada fulan neen sira na’in rua ne’e troka malu asumi ministra ka ministru interinu nu’udar oportuniadde ba sira vinga malu.

Durante minutu hirak nia laran sira haksesuk malu, iha gravasaun ne’e la rona diretór nia lian.

Ikus liu husi gravasaun ne’e maka Bonifácio husik hela Élia ho diretór no la’o sai tiha husi sala ne’ebé sira haksesuk malu ba. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 503
  • Page views today : 653
  • Total visitors : 77,879
  • Total page view: 109,118

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur