Notísia foun


Timor Post servisu hamutuk Embaixada Korea públika artigu hosi Embaixador Korea ne’ebé inspirativu tebes kona-ba istória dezenvolvimentu Korea nian bainhira hahú ukun rasik an ho kondisaun kiak tebes, laiha indústria ba kampu servisu ne’ebé halo dezempregu aas   hanesan ho Timor-Leste. Iha kondisaun balu hanesan no balu la hanesan, Korea la soi minarai no gás hanesan Timor-Leste, maibé oinsá Korea bele hamriik sai rai/país ne’ebé ho ekonomia avansadu númeru da-10 iha mundu no simu traballadór estranjeiru sira inklui Timor-Leste nian ba servisu iha Korea? Mai ita akompaña série artigu Embaixadór Korea nian tuir mai.          

 

[caption id="attachment_698" align="alignnone" width="203"] Lee Chin-Bum
Embaixadór Korea ba Timor-Leste[/caption]

Ha’u toma responsabilidade nu’udar Embaixadór Repúblika Korea iha Janeiru 2018. Ha’u haree buat barak wainhira la’o hale’u Timor-Leste durante loron ualu (8) nia laran iha semana rua ikus fulan Abril 2018. Ha’u hakfodak. Timor-Leste kuaze hanesan ho Korea iha 1960. Hare ba hanesan maun alin kaduak.

Buat hitu ne’ebé mak Korea-Timor hanesan

Ida, oras ne’ebé hanesan. Tuku 6 iha Korea, iha Timor-Leste mos hanesan tuku 6. Timor-Leste no Korea  bele reza iha oras hanesan, dader haree loro-matan hanesan.

Rua, rai ne’ebé tasi hadulas. Wainhira nasaun ida la iha kbiit, nasaun barak mak sei halo invazaun liu husi tasi. Maibé, wainhira nasaun dezenvolvidu, bele kaer ikan barak iha tasi no esporta ba rai seluk.

Tolu, rai ne’ebé nakonu ho foho. Ida ne’e hatudu katak fatin atu halo to’os ladun barak. Maibe, foho ajuda rai ne’e defende nia an durante funu iha ailaran hasoru ema husi li’ur.

Haat, rai ne’ebé ki’ik. Korea Sul okupa pozisaun 110 husi total nasaun 230 iha mundu no Timor-Leste okupa pozisaun 157. Ba Korea no Timor-Leste atu denzenvolve an, presiza halo komérsiu. Agora dadauk Korea okupa pozisaun 10 nu’udar nasaun ho total volume komérsiu boot liu iha mundu. Timor-Leste mós presiza halo komérsiu.

Lima, moris iha okupasaun nia okos ba tempu naruk nia laran. Maske moris iha presaun maka’as nia okos, nunka lakon esperansa luta ba ukun rasik an. Ema hotu hamutuk luta ba ukun rasik an.

Neen, ema barak lakon nia moris durante funu, no fasilidade barak mak hetan estragu. Depois funu, ita hotu hamutuk hadia nasaun ne’e husi zero. Hetan ajuda husi nasaun barak no komunidade internasionál.

Hitu, iha nasaun forte barak mak haleu. Rai ne’ebé maka nasaun forte sira deside hodi fahe ba rua. Dalabarak nasaun boot koko atu interfere nasaun seluk nia soberanu, maibé iha mós vantajen dezenvolvimentu ne’ebé lais liu wainhira halo kooperasaun ho nasaun forte.

Timor-Leste no Korea iha istória, jeografia no buat barak ne’ebé mak hanesan. Tanba ne’e mak bele aprende buat barak ba malu. Bele mós kompriende malu hanesan maun alin kaduak no bele mós sai belun rohan laek.(Kontinua ba edisaun tuir mai)

 

Please follow and like us:

NOTÍSIA FOUN

Site Statistics

  • Users online: 7 
  • Visitors today : 687
  • Page views today : 1,007
  • Total visitors : 73,619
  • Total page view: 102,265

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur