Notísia foun


DILI—Submisaun ba Komisaun C trata ba assuntu ekonomia no finansas, Parlamentu Nasionál husi organizasaun naun governamental La’o Hamutuk kona-ba Proposta Orsamentu Jerál Estadu (OJE) 2020, afirma, suspende projetu boot sira hanesan estrada, portu, aeroportu, auto-estrada, eletrisidade no edifísiu sira inklui projeitu tasi mane.

Rajaun husi submisaun ne’ebé hatama ba parlamentu nasional iha loron 30 Outubru 2019 ne’e, tanba tetu ba governu gasta kapitál dala ida de’it hodi harii projeitu sira ne’e maibé kustu ba manutensaun no operasaun kontinua la’o no aumenta aas ba beibeik.

“Iha ita nia istória despeza nian, governante sira husu de’it osan atu harii ka gasta ba sira nia setór maibé la diskute kle’an se gastu sira ne’e bele ajuda lori solusaun ba problema nasaun nian no asegura Fundu Petrolíferu nia ezisténsia ka lae,” subliña iha dokumentu submisaun ne’ebé Timor Post asesu.

Nudár ezemplu, iha dokumentu ne’e haktuir, gastu ba eletrisidade iha tinan 2020 sa’e ba tokon $196 enkuantu iha tinan 2019 gastu ba eletrisidade tokon $108 de’it. Gastu ne’e inklui manutensaun no operasaun tokon $32, kombustivel tokon $148 no liu husi infrastrutura hamutuk tokon $17.

Tanba ne’e, sujere iha dokumentu ne’e, bainhira Governu halo planu no harii edifísiu ka infrastrutura seluk inklui estrada sira, presiza halo kalkulasaun kompletu hodi hatene la’ós de’it kapitál maibé mós kustu ba manutensaun no operasaun nian atu nune’e bele halo desizaun di’ak no adekuadu.

“Ami sujere atu suspende Projetu Tasi Mane tanba bele uza hotu Fundu Petrolíferu ne’ebé iha no mós rekursu sira seluk ne’ebé tuir loloos bele uza ba dezenvolvimentu ida ne’ebé produtivu, realistíku no sustentável liu,” afirma iha dokumentu parser ne’e.

Iha Fundu Infrastrutura, governu aloka ona tokon $5.5 atu muda komunidade sira iha Betano, area auto-estrada faze rua, no Beaçu, maski laiha alokasaun atu konstrui no opera projetu iha fatin sira ne’e. Projetu Tasi Mane tomak bele gasta osan liu biliaun $18, no hirak ne’e seidauk inklui kustu manutensaun no kustu operasaun.

“Ami husu ba Parlamentu Nasionál diskute ho kle’an konsekuénsia ba levantamentu sira iha OJE ba tinan hira tuir mai atu implementa komponente sira husi Tasi Mane.

Tabela 1. Osan gastu ona, iha orsamentu no presiza atu harii Projetu Tasi Mane.

Governu Retira Proposta OJE 2020

Entretantu Governu Aliansa Maioria Parlamentar (AMP) liuhusi Primeiru MInistru deklara retira tiha ona proposta Orsamentu Jerál Estadu (OJE) ba tinan fiskál 2020 nian, atu hadi’a hikas tanba bazeia ba relatóriu Komisaun C ne’ebé trata ba assuntu ekonomia no finansas konsidera proposta orsamental ho total billaun $1.95 boot liu no inkonstitusional.

Debate jeneralidade ba OJE  2020 hahu iha loron Segunda (02/12/2019). Maibe tenke para iha dalan klaran.

Hafoin retira proposta OJE 2020, iha plenária Parlamentu Nasional, Tersa (03/12/2019) lorokraik, Primeiru Ministru promote sei aprejenta fali iha loron 13/12/2019.

Ho nune’e, tuir ajenda, plenária sei hahú debate hafoin simu proposta foun no halo diskusaun iha plenaria to’o loron 23/12/2019.

Hafoin rona tiha Primeiru MInistru nia desizaun retira OJE 2020, Prezidente Parlamentu Nasional, Arao Noe deside ensera plenaria Parlamentu Nasional. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,200
  • Page views today : 1,714
  • Total visitors : 32,410
  • Total page view: 44,572

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur