Notísia foun


DILI—Diretór Ezekutivu Forum Organizasaun NonGovermentais Timor Leste (FONGTIL), Daniel Santos do Carmo, hateten durante tinan barak governu abandona aspetu rua ne’ebé bele fó retornu ba estadu, maka ekoturizmu ho turizmu ne’ebé kria husi ema (pariwisata buatan, sigla-bahasa Indonezia).

 

Nia hateten, Timor-Leste iha fatin barak mak ne’ebé atraitivu ba turizmu, hanesan turizmu istória, turizmu relijiaun no kulturál inklui turizmu natural, fatin hirak ne’e governu ladún tau prioridade hodi dezenvolve durante ne’e.

 

“Ita haree, aspetu rua ne’e ninia dezenvolvimentu seidauk la’o hotu, tantu ekoturizmu no turizmu ida ne’ebé ita ema mak halo, ita ko’alia los de’it, labele bosok malu, to’o ohin loron governu abandona,” nia hateten ba Timor Post iha Balidi, kuarta (10/09).

 

Nia dehan, sekuandu fatin hirak ne’e governu la dezenvolve ho di’ak, entaun susar ba ema atu ko’alia ekoturizmu, ligadu mós ba turizmu buatan ne’ebé ema halo rasik, iha sidade Dili no munisípiu sira, fatin hirak ne’e bele dezenvolve no atraitivu ema nia hanoin atu bele ba maibé abandona, ladauk dezenvolve.

 

Iha sidade Dili, nia hateten governu konsege halo ona jardín balun maibé jardín hirak ne’e halo hanesan musiman deit (sigla Bahasa), ohin halo manas maibé aban ba oin abandona fali ona .

 

“Ha’u fó ezemplu, jardín Largo Lesidere kuandu foin hahú, iha ne’ebá iha seguransa, iha ema dasa mas liu de’it fulan ida-rua laiha ona, agora ita bolu fali jardín B.J Habibi agora ita dezenvolve depois ema ba harame, ha’u la fiar ida ne’e sira mantein kontinuasaun, tanba ita haree laiha seriedade manutensaun no laiha seriedade kuidadu fasilidade sira iha ne’ebá, to’o fulan rua -tolu ita asiste sei abandona,” nia kritika .

 

Iha ibun, nia dehan governu ko’alia atu dezenvolve turizmu maibé prátika la halo, klaru ezije mós devér sidadaun sira nian oinsá mak atu uza fatin hirak ne’e ho responsabilidade.

 

“Maibé ita nia estadu hanesan reguladór tenke hatuur nia papél ho di’ak iha ne’ebá, nune’e saida mak estadu investe bele fó retornu no bele sustentável husi retornu ki’ik oan ne’ebé ita hetan,” nia ko’alia.

 

Nia fó ezemplu, governu halo fatin turizmu, ema ba iha ne’ebá tuur livre nein halo kontribuisaun ruma.

 

“Ida ne’e hanesan de’it, oinsá mak atu bele sustenta, sé governu laran metin de’it ba osan fundu mina rai, ne’e susar  e governu presiza regulamentu ruma hodi dezenvolve,” nia hateten.(res)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 53
  • Page views today : 59
  • Total visitors : 72,985
  • Total page view: 101,317

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur